عمت عيني عليج وليش يابغدادمو جنتي اعله ليلج هذا محسوده
ما اشوفج مدينة وضاويه وتزهين اشوفنج نذر للموت مكيوده
ودجلة بيا وجه للخضر تهدي شموع اذا صارت جرح عالكاع ممدوده
وضحكتنه صليب وصرتي عيسى اعليه اغسلي ايدج بعد تبقين مشدوده
لان ريح الطمع رجف هواي كلوب وثكل كلش طمعها وحيل مهدوده
بس باب الحوائج فاتح البيبان وبقيت البوب كلها بخوف مسدوده
شوكت تصفى النوايا ويرد وجهج ذاك خالي من الدمع ومورده خدوده
ويرد ليلج ثمر وعيونج النجمات وزريابج يرد يعزفلج بعوده
ويرجع سندبادج خايف اتلكيه افرشيله الحضن وتروح البروده
ونصيحة من الكلب ابنج واخاف اعليج نصيحة من اليحب للمحب مريوده
القبل يذبح ضحكتج بالج تعذريه وبيبان العتب خليها مسدوده
اذا نبقى سنابل ننحصد كل يوم خل نبني الوطن ونصير حاصوده
__________________
