شعجب دفترعشكته ماتكلبه
وليش اللي يكلبك ماتكلبه
احس كلبي بغيابك مات كلبه
كلب كلبي توفه وعم عليه
سبحان الرسم خدك وشم بي
وتمنيتك عطر بيدي واشم بي
عيونك حفرن بكلبي وشم بي
وبدونك ريت تاخذني المنيه
روحي وياك ماتكطع وصلها
وتفرح لو خبر منك وصلها
تضل نبع المحبه انت واصلها
وتضل رغم البعد غالي عليه
بجفاك النوم فاركني ولارد
وكلبي ماهوه غيرك ولا راد
ابد ماجوز عن حبك ولارد
ويضل حبك لاخر نفس بيه
جرى دمعي على خدودي مراحل
وبعد حبك بدلالي مراحل
اذا ناوي الهجر ابدي مراحل
مو غفله وتسد بابك عليه
سكاني الدهر من فركاك بس مر
وشهد ماشفت من دنياي بس مر
رمش عيني افرشه بساط بس مر
ترد الروح من اتمر عليه
نص احترك من بعدك ونص طاف
ونص بهواك غركته ونص طاف
ياريت المدرسه ترجع ونصطف
وابدلك بالعلم واخذ تحيه
شهد شمام شربت شكر شفتاك
شهد شلزم شعوفن شكض شفتاك
شهد شاهد شهدني بيوم شفتك
سلب عقلي وتركني بلا وعيه
يادنياعلى الصديق الزين شهدي
طعم مر بغيابك صار شهدي
الك غير الكلب ياخوي شهدي
شتظن غير الكلب يصلح هديه
امس بالليل بستك وانت نايم
وانا السهران ليلي وانت نايم
هنياله النام يمك وانت نايم
واحضنك للصبح بثنين ايديه
وحك رب التعبده الناس واحد
حبيب الكلب مش اثنين واحد
اذا للمحبه ردت اختار واحد
اختارك الك وانسه البقيه
وصل مكتوب من عدكم ورد بي
حرت شاكتب جواب الكم وارد بي
الفرح والطيب منكم ورد بي
نتفارك والمحبه تبقى نفس ماهيه
كلبي مافضى الغيرك وفضلك
وروحي مانست طبعك وفضلك
اميزك بين الف صاحب وافضلك
وتبقى انت الوفي وغالي عليه
الهجر يكتل كتل ياعمري وانت داري
عليك يخاف كلبي وانت داري
انت اهلي وعمامي وانت داري
وانت الدنيا كلهه واعز مخلوق اليه
يمين الله الكلب صابر ولا مال
وابد ماحاد عن دربك ولامال
بكنوز الارض مابدلك ولا مال
ياضي العين شكد غالي عليه
اني بجيش حبك لاشد رتبة ملازم
واريد اطبع كتب محبتنه ملازم
وهاي الدنيا من غير حبك ملازم
وشلي بالدنيا اذا ما تسأل عليه
تضل نجمه ياضوه العين بسماي
ويضل اسمك صديق العمر بسماي
مايروي العطش بجفاك بس مي
العطش تروي من تسأل عليه
سكر كاس الخمر من ضاك نفسك
اكو غيرك حلو بس ماكو نفسك
اريدك ياحبيبي تبوس نفسك
بس بداخلك تنويهه اليه
شكثر بجفاك ون كلبي وهم لك
وعقلي غفل فاركني وهم لك
شلون انساك يالغالي واهملك
وانت ويه الكلب تنبض سويه
الوفي مابطلت فد يوم ذكره
وكلبك لو نساني ارجوك ذكره
على الحايط كتبت بحزن ذكرى
عزيز ويصعب فراكك عليه
ردت طيفك يلوح بيوم مالاح
وطعم فركاك صار هواي مالح
بعد مادز رساله وبعد مالح
لان كلما ادز مترد عليه
لزمت العشك بجفافي شهد بي
وطعم العسل بشفافك شهد بي
ولزمت الكلب كلبته شهد بي
شهد الغزت روحي والدلال هيه
الف وسفه الوكت عنك بعدني
اموت وارتجي وصلك بعدني
تراني عالعهد باقي بعدني
انطيك الروح اذا تقبل هديه
نشدت الناس عنك وانت ماكو
على الهم يصاحب مثله ماكو
اريد اسمع اخبارك شكو ماكو
وانا الممنون من تسأل عليه
وكع ميزاني من حبك والك دك
وكلبي الما يدك لاحد الك دك
جهازي رسل من وحده والك دك
لان اثنينه نحبك سويه
افكر بيك ياعمري ولانام
ولاغمض جفن عيني ولا نام
احب بس اكعد كبالك ولا نام
بعيد وشوفتك حسره عليه
العسل بفراكك صاير مر علينه
شيصير اهواك لو مره مر علينه
شفت مره خيالك مر علينه
ركضت بلا وعي وشبكتك بثنين ايديه
انا الشديت جرحك ليش حليت
ومثل حلة مدارس علي حليت
ذكرتك بامتحاني وغلط حليت
شجاوب وانت شاغل حتى ايديه
اكتبلي شما ردت تكتب واردلك
ازعل وابتعد وامشي واردلك
بستان بوسط كلبي ورد لك
شما تبعد تضل غالي عليه
عليك الكلب فك عينه واذانه
وكلامك حيل عذبنه واذانه
اذا باسك شخص تسكت
واذا اني ابوسك تكلب الدنيا عليه
افرح لو شفت وجهك واسر بي
وحبك بكلبي ثبت واسر بي
شما طال الدرب لامشي واسر بي
واجيب الروح لعيونك هديه
علي لو أشرت بيدك أشارة
يعني تريدني وللحب أشارة
وكل ترفك يفتحلك أشارة
والمروريكوم ياخذلك تحية
طعم هجرك حبيبي طعم فلفل
وهواك الغالي فل الكلب فل فل
العاذل من محبتك هاي فلفل
يموت وأبد ما يكدر عليه
أخبار الناس ماضايع علمهه
مثل دولة وتصير أنت علمهه
اليتيمه شكد تبجي على أمهه
مثلهه أبجي لو تبعد عليه
المسائل بالدراسه تريد حل حل
وأنا بمشكله اليوم وأريد حل حل
أحس وكت العتاب وياك حل حل
غرامك مشكلة ووكعت عليه
