عيون الگاع نفس عيون الانسان
دوم تصب دمع ع البيها مدفون
وانه بگاع العيون اندفنو عزاز
ارد اعرف ليمته بعيني يبقون ..؟
ابجي عيون حاير من يجي الليل
ومن اتعب ترد تبجيني العيون
بعدكم نخر روحي واثر هواي
رك حيلي وتركني لهسه مطعون
گلت تهون سهله وتمشي الايام
شفت ايامي وگفت وانتو تمشون
مزمن بيه حبكم ما اله علاج
يوجعني بكثر ما بيه تقسون
وصوركم عندي ذكره تگطع الروح
وبلاوي البصور شگتلي العيون
بجيت وما ردتها تسيل الدموع
لان خايف عليكم لا تطيحون
انه بعلمي خسرتكم بعد شيفيد
ما ينفع بحلمي شما تمرون
انه ضنوني ابعدكم صارت هواي
ها رجعو علي .. ها ما يرجعون
والله الدنيا خربت يوم الوداع
ضاگ الكون بيه وضگت بالكون
وبقيت لهذا يومي مرصّع فراگ
اتانيكم گلت هالبت تردون
لزم جفي الطريق وخذني وياه
وعثرت بعشگ وادم ما يوافون
بعدكم ما اظن تحلالي دنياي
بعدكم ما اميز حظي يا لون
بعدكم ما مشيتو وراحت الروح
بعدكم حال ليلى بلايه مجنون
بعدكم عني وكتي وانتم اگراب
بعدكم انه سيف برگبه مذبوح
بعدكم مدري شنهي الصاير وياي
حتى بشعر راسي تبين جروح
صعدت سطوح حبكم وانه تعبان
وكل بايـه بطلعتي اطلع الروح
لگيت تفوح رحية ذيج الايام
صعدت فوگي رأسآ كل السطوح
{ وگلت مسموح الكم كلشي يحباب
بس عني البعد ماگلت مسموح . .