ياهو الجابك ورديتلي شلون
اجيت تشوفني و بعيونك اشواگ
لو شامت اجيت ويه اليشمتون
اشو صافن عليّ والرجفة بشفاك
رمشك ما رمش تعبت الجفون
معقولة الخجل لو تحس ندمان
هم عندك احساس ويه اليحسون
لتگلي آنه اسف وآنه غلطان
الندم شيفيد ويه اللي يغلطون
الحصل منك حصل والله اليجازيك
ويجازي الناس عني شما يگولون
اجيت بيا وجه وتگلي مشتاك
تره جرحك كلف لتصدگ يهون
الي چانت محبتي وياك بستان
الفلح چانو مشاعر بي يفلحون
چان الماي عدهه دموع الاشواگ
وصفه المعول صفة وبالحب يزرعون
زرعنه الشوگ لكن خضّر اشواك
الثمر سلة غدر خضّر بالغصون
اغدرت بيه وعفتني ابين نارين
نار من الجفه ونار اليلومون
شلون تريد امدهه النوب الچفوف
على چفي بقت آثار الاسنون
اگلك كلمة وحدة بصوت مسموع
وجيب الناس كلهم خل يشهدون
اكرهك والله اكرهك عوفني وروح
يل تمثل تحبني وعود مفتون
لا تبچي بدمع وادور اعذار
ما ردلك بعد لو تبچي العيون
