بعدني وداعتك .. بعدني وداعتك صدكَني ما مرتاح
والف حسبة بعدها ببالي تتمشى
ياكل كَلبي همك كل صبح وكل يوم
ويرد بالليل يرجع حتى يتعشى
نتزاعل كَبل كل مرة وارضى وياك
ولو كل مرة انت الـ تبدي بالحرشة
وما ارمش جنت من انت يمي تصير
جنت اشتاكَ حتى بلحظة الرمشة
ابنيلك عشكَ بكَليبي ليش شبيك
تلزم كَلبي كلة بـچفك تفلشة
روح وانساني ماريدك لا تهواني
ملت منك هالروح ماشافت غير جروح
لك روح وانساني ماريدك لا تهواني
ملت منك هالروح ماشافت غير جروح
تغفى براحتك كلما تريد تنام
واني اسهر واحس شكَد الك وحشة
وتجرحني الصبح لازم اشوف جروح
رغم هذا اجي واتحضر الغبشة
اجيك وعندي شوكَ لشوفتك
والكَاك شايلي جرح باحساسي تنقشة
وتسألني على جرحني الفات ها ما طاب
اكَلك اي شوية وترجع تخدشة
اضم دموعي ذمة بركَبة العينين
واكَلك هذا سري بكَلبك تفرشة
وتلزم عيني انت تلم عليه الناس
وتفضح سري كلة بنصهم تطشة
مطرود من بالي خليني اعيش بحالي
والذكرى المرة تموت وية كل ساعة تفوت
مطرود من بالي خليني اعيش بحالي
والذكرى المرة تموت وية كل ساعة تفوت
صحتك .. صحتك انا احبك جسمي كلة يصيح
درت ظهرك عليه انطيت اذن طرشة
كَلتلك هاك عمري الـ بي ورد ذبلان
كَلتلك ديربالك .. ديربالك فدوة لتعطشة
وعطشتة وهملتة ومكتفيت بهاي
شفت .. شفت كَدامي عمري بـچفك تحشة
اذا تكَطع ورد من غصنة جثة يصير
ما ينفع بعد بدموعك ترشة
مليتك صدكَ متحبني ما اهواك
خلي الحب حلو ماريدك تغشة
ماحبك بعد كل حبي مات اليوم
وانت بهذا چفك شيلت نعشة
وانت بهذا چفك شيلت نعشة
ممنوع تشكيلي ماعذرك لتحجيلي
ماتسوى اضل وياك محتاج ابعد وانساك
ممنوع تشكيلي ماعذرك لتحجيلي
ماتسوى اضل وياك محتاج ابعد وانساك
صدكني ما مرتاح
شـعر والقاء : صهيب السامر
غناء : جي فاير
الهندسة الصوتية : جي فاير
الحان : جي فاير