يافرت لابغد مكان حته اكدر اني اعوفك

سافرت لأبعد مكان حتى اكدر اني اعوفك
وفكرت كلت بغيابك راح احرم عيني شوفك
ومن وصلت هناك اني
غمضت عيني لثواني
فتحت ما شفت اي شي
بس سمعت حجاية تمشي بخيط مشدودة عبالك من اذاني لطرف رمشي
كالت اسمع اريد اكلك
ماكو واحد سوى مثلك
على كلمه وسبب تافه تترك احبابك وخلك
هذا خلك ما بجه وفد يوم ملك
والكلام الي سمعته
عينك اني الي كتبته
نضر عيني شلون هنته
وانته تدري ما اعوفه لوجبت نار وحركته
عينك اني الي تركتك
وسبب هجري كله منك
كتلك اني ما اعوفه تعودت كل يوم اشوفه ولو تركته راح اهلك
انته ذنبك على جنبك
بيدك اختاريت سهمك
ما دريت الزمن يغدر ويرجع بسهمك يجرحك
هسة مبروك ارد اكلك
يالتركت بخفيه خلك
عيش الايام بندامه وحسرت الماضي تسلك
بس خطيه راح افهمك
عندي لو حبيت حلك
بس شروط هواي عندي لو توافق راح ادلك
١.تنسى الخيانه وتحبه بأحساس وامانه
٢.تطلب سماحه وتعيش وياه بالصراحه
٣.وهاي اكيده تنحني وتبوس ايده
ويصير حبك مثل حبه وكلبك تربطه بوريده
يعني كلبك يبقى عنده وتقسم تفرحه وتسعده ولو حزن فد يوم مره تصير الدموع على خده
ولو صعب عندك الموقف وماعرفت انته تسكته
احجي حب وبغزل سولف واربط شفافك بشفته
ولو زعل وتموع اكثر يعني راد تبات عنده
بات عنده شنو يعني لو بست راسه وحضنته
خلك وحقه يريدك هذا مربوط بوريدك
خل يحس بدفو حضنك حجي العالم ما يفيدك
عيشو قصة حب خيالي وكله حالك نفس حالي
وجهك بجفني رسمته وعلى عقلي اصبحت والي
كل دقيقه اني اذكرك لحضه ما فاركت بالي
اسمك بدمي كتبته يعني عندي صرت غالي
واني هم حبيت اسمعك
تحجي عن حبي وجمالي
وتبتسم وتكلي اضحك موج حبك عندي عالي
مستحيل انساك لحضه لو وسوس أبليس وقرالي
حتى اكدر اني اضحك وبحجي العالم ما ابالي
ومدرسه لحبنه نفتح ونحجي بيهة بصوت عالي
ندرس اجيال بعشكنه ومنهج الحب المثالي
خلي كل الناس تسمع الدنيى ماكدرت علينه
احنه بيهة جنة نلعب هية ما لعبت علينه
تنتضر جانت ليالي حته بس تسمع حجينه
مثل شمعه تموع يمنه لو تغازلنه وحمينه
احسنلج ابتعدي يادنيى من يطول الليل بينه
احنه نار وهية شمعه تموت لو قربت علينه
الدنيى ما عارظت بيهة شما كتبنه شما محينه
يعني صارت مثل ورقه استسلمت جوه ادينه
الدنيى ما عشنه احنه بيهة الدنيى عاشت هية بينه
شاركتنه كل وكتنه ولو بعدنه تظل حزينه
ولو زعلنه طول اكثر تبقى مثل الطفل تزحف تبجي وتباوع علينه
الدنيى ما ظعنى بوضعهة الدنيى ضاعت هية بينه
تغيرت كلش الدنيى وصارت الدنيى حنينه
ظوت بكل درب حبهة وعاشت بحبهة المدينه
ومن عطشنه يمهة احنه خلقت انهار بدمعهة ومن نهرهة احنه ارتوينه
الدنيى صارت النه مزه وكاس الخمور البدينه
وانتظرت نخلص خمرنه حته من نسكر تجينه
ولو سكرنه بحر حبنه تفتح شراع بظهرهة وتصنع لحبنه سفينه
الدنيى ماحرنه بتعبهة الدنيى حارت هيه بينه
احنه عشنه قصه حلوة ابد ماجانت حزينه
ولو طبعنه كتاب حبنه وصل للعالم حجينه
يمكن نصير احنه دوله ونبني بحبنه مدينه
باب دولتنه الصراحه والكذب ما يشترينه
دولة ما تعرف فوارق شما فقرنه شما غنينه