يبو خدود الورد داخ النحل بيك
يبو خدود الــــــــــورد داخ النحل بيك
وصبح كلّش مهـــــــذب بطّل الكَرصه
ولجدمك تفــــــــــــــــطّر ﭼبد الدروب
العلوة بجمـــــــــــــــالك ربدت النصه
احذر لاتمر فــــــــــــي مركز التموين
يشيلون الشكـــــــر وتعم عله الحصه
وحيايا اعلــه الـــــدرب خلينه العيون
بخلكَ صياد مـــــــــل وماسحل شصه
شمدرينه بجـــــنابك من نسل هارون
وارث علــــــــــم اخيه وتنكَلب عصه
انعجن كَلبــــــي بغرامك شلي بالتنور
بس تنظر علـــــــيه تشعوط الكَرصة
ومن اسمع كـــــــلامك تشركَ الاذان
واشرب مـــــــاي بذني وابلع الغصه
دكَلي شلون حــــــالي بشركَة الريج
واذا دنيت حلكَك منــــــــهو اليخلصه
اقسملك لـــــــــــون تكَعد مع الطلاب
يخنكَون الجـــــــرس لو فكّر بفرصه
ويدرسونك مَثــــــل في عالم الاحياء
بلا مجهر كيــــــــانك قادره اتفحصه
وبعد مانحتاج كـــــــــاشف للمحاليل
كل محلول انتـــــــه بعينك اتشخصه
سحل جبت الخـــبر والمبتدأ مجرور
ومفاعيلــــك شعر منصوبه عالكَصه
من كال المصــــــانع ثقبت الاوزون
زركَ عينه اعله طولك وانشلع فصه
وصرت للكَـــــــــاع مصدر احتباس
وبكل الظــــــــــــواهر قائد الخبصه
لغو قانـــــــــــــون مندل يوم اجيت
من علم الـــــــــوراثه الفلشت نصه
لان اخضر عيونك مـــو مزج الوان
برابع لون اســـاسي الصورك خصه