الدنيا للتهواه تفتحله بابين

الدنيا للتهواه تفتحله بابين
تحميه من الزلات ومصايب البين
الدنيا للتهواه توقفله وقفه
ويضل رشيد الراي محد يعرفه
الدنيا للتهواه ترخيله حبال
تنزل الطيب عليه وتغير الحال
الدنيا للتهواه تطلع لو ثديها
وتقضوا خاف يطيح بثنين ايديها
الدنيا للزنكيل ترقصلا جوبي
وأنا الفقر ياناس شكالي ثوبي
يا التنشدني عن الحال ضاقت فرد نوب
ساترني بين الناس خلف الله على هالثوب
الرايد يعيش اليوم يتحزم حزام
وما يطلب العونات إلا من الإزلام
تحزمت اليوم بس حظي نايم
تاليها بالعونات اشبع هضايم
خل نفسك بعز دوم بالك تذلها
ولا تطلب الحاجات إلا من أهلها
متوازي والحاجات غياب أهلها
وهذا الوقت للأنذال خلاني أذلها
هذا الوقت مغشوش يا صاحب الراي
الزرع بيش يعيش لو فارق الماي
الوقت بيه يدور وأنت التعدله
صدق ابد مايصير غيرك يبدله
بت بعد بالدلال جاهل يعت بيه
يبكي من أصيح عليه يقطع من أخليه
بت بعد بالدلال وجروحه تسعين
هم ينفع التضميد للصاير طحين
همك وهم الناس وهم هم الهموم
لو وحده منهن بيك ما تقدر تقوم
همي شكثر ياناس لو ردت أوصفه
همي بكثر دنياي والباقي يخفى
نتراهن أنا وياك يا هو أكثر هموم
همي بكثر دنياي والباقي مضموم
اوه نداه الروح جي تضحك بساع
ماتدري عندها هموم بكد حصو القاع
متعجب المهموم يشرب جكارة
همي بكثر مانوح تجويني ناره
يا معزبة شيلي الزاد بالهم تغديت
من عقب طاري هواي بالزبده غصيت
صحت حيل وحيل وباليمنه اوميت
ويا هوا الصحتله دخيل ضم روحه بالبيت
زين أنت ويضل بالبيت الردته فزاع
أنا القلتله دخيل ضم روحه بالقاع
ثاري الزمن غدار سواه بيه
ضحكني ليله ويوم بجاني ميه
بالك تمر بالدار عنها ابعد بعيد
دار العزيز هواي نوح وبجي تريد
عمدن أريد أمر بالدار واشبع مغمة
وابجي بجة المفطوم من يذكر أمه
عمدن أريد أمر بالدار والنوح ازيده
واسمع صداها يقول راح التريده
عمدن أريد أمر بالدار لو تشبك رماح
والمعتني الطيبات شي يهمو لو طاح
عب واشتري من السوق وانصبها بيه
افجرها من تريد تزعل علية
كون الدمع ينشال وبعينه خليك
كل ما حن واشتاق ابجي واحاجيك
ضايع وادور عليك والدمع بالعين
ثاري القلب خافيك بي الشرايين
كون الحبيب يصير مقلد والبسه
بين النهد والزيج سنتين احبسه
كون الحبيب يصير ترجية بذني
ان قمت وان قعديت ع الخد يحبني
رحت انا للدكتور شاورني بسكوت
لو ولفك يداويك لو باجر تموت
حاير تدور شبيك وبنص القبور
اذكرها قالت يوم هذا القبر زور
للمقبرة تعنيت رحت انشد الميت
قلت شخذت وياك قال القبر بيت
للمقبرة تعنيت أركض بهمه
يا الدفنت هواي ادفني يمه
الميت شمدريه باليمشي دفان
لو يدري يمشي هواه جان شق الجفان
الميت شمدريه باليمشي جناز
لكن طبع بالروح نمشي ويا العزاز
مابيك اجيك زحوف مابيه مشاي
زيبق بكف سكران خلتني دنياي
منين البخت يافلان وتقلي مبخوت
رحت اشتغل دفان شو محد يموت
كون الخميس يشيل منك يالسبوع
بيه زفت المحبوب وتهل الدموع
الدهر بس وياي سواها هرجة
الحمل ظل مطروح والناقة عرجه
لعبت الدنيا وياي لعبت مجانين
تطلعني من السيان وتذبني بالطين
لعبت الدنيا وياي لكن شلعبه
تشبك رمح بجلاي وتقول احبه
احبك يابعد عمري واضل بحبك اتباها
محبتك مو صنع ايدي الله سواها

الله على العذال سوها بيه
خلو حبيب الروح يزعل عليه
صوت الصلاة مسموع يما اندعيلي
شو ربي بالكلفات تارس شليلي
أرد انشد الروح ما أسئل الناس
شمعنا القلب يشيب ماشيب الراس
شاب وشبت والشيب مالايق وياي
كل دقج ع الراس بسج يادنياي
متعجب من الشيب غط هدب العيون
اني طلعلي الشيب من حدر السنون
متعجب من الشيب غط هدب العيون
قمت اني اشوف الديج حسبالي بزون
هم شفت هم سمعيت هاي العجيبة
بعيني شفت ياناس برية شيبة
فاله بخمس شاخات حمرة وجديدة
حطها بقلبي وصاح اطني الحديدة
فاله بعشر شاخات وكل شاخة بسيفين اثنين
حطها بقلبي وصاح ماصابتك زين
در التراب يصير ببيد العريبي
وانا الذهب تربان ينقلب بيدي
عايش وحق عيناك لكن شعيشة
نار صعدت للطير وحرقت ريشه
اه شكثر مكروه اليخلي جيبه
حتى الرضع وياه ينكر حليبه
تلهث تلم فلوس شقد رايد تعيش
الجفن ماله جيوب بس الدشاديش
عرجة وكسرنه البين وبعيوني مااشوف
جابولي طاري هواي قمت ازحف زحوف
أنت القلب والروح وأنت المحنة
للنار أروح وياك وأحسبها جنة
بهيمه واخذني الليل ومخاطف الذياب
كل هذا وتعنيت يم دار الحباب
أعمى وبلا رجلين ومشبك بطوق
كل هذا وتعنيت من هزني الشوق
والحمزة والعباس والبيت الحرام
انسى امي كون انساك وابرى من الاسلام
سود العيون كبار والحلق محبس
يستره رب الكون لو دلع يلبس
يلبس دلع يافلان صايرله موده
بس الدهر خلاه ينكر وعوده
يلي تخافين الموعد والرسايل
هذا الرقم خبريني ع الموبايل
ارد انشد الصباغ هم يصبغ قلوب
اصبغ دليلي عليك واحزن فرد نوب
كل من يقول انساك صدق اشاعة
ذكرك يمر ع البال كل ربع ساعة
دق دقتين رداف قلبي وسكت ليش
احترق دم البيه يفتر بعد ليش
القلب لو ينساك للسوق اجيبه
واكتب عليه للبيع خاين حبيبه
حاسدني وانت وياي ورد الخميلة
واسمع يقلي منين هاي الجميلة
بدرب التحبها الروح اسهر ليالي
حتى الرصيف اليوم يبجي على حالي
قلب التولع بيك وانغلق بابه
وخيم عليه الضيم مثل السحابه
لن اشتكي الاوجاع مادمت حيا
وياليتني يادهر لم اكن شقيا
البيدا زف هواه قلبه شقواته
يتوجة ع الرمحين خوف الشماته
البيده زف هواه بس الله يدري
أعظم مثال يصير للهوى العذري
غربة ودمع همال فايض بيدينا
ومشتاقه للاحباب روح الحنينه
يايما لا تنباقين بطله النطارة
خليني ويا هواي شربة سكارة
لا تشتكي للناس فالهم عابر
واسخر من الشدات ان جنت عابر
لا تظن سفرنا يطول ليش انت خايف
ولغيرك يظل ممنوع بوس الشفايف
يامسافر الله وياك بسم الله محروس
ويشفة بعد شفاك تستاهل البوس
ع الوجنة مر بشفاك لو ماكفة الشم
والماتعرف تبوس بوستها اطعم
شفافك على الوجنات ورد بعشقها
وباجر على البوسات ينضج خلقها
طفلة وحلقها زغير ماتعرف تبوس
بين الرمش والعين خلتني محبوس
ارد انشدك يافلان يالبهوى استاذ
تقدر تخيط جروح مالها ضماد
اقدر اخيط جروح قلبك وتبرا
بس لو حبيب الروح يلضملي الابرة
خل جرحي ينزف دوم مااريده يبرا
جف الجرحني شلون يلضملك ابرا
عضني الدهر بخبال وضروسه طاحت
كل هذا وماصحت اخ شماتي صاحت
متعني للعباس ابجي بحضرته
والينكسر بهواه شنهوا جبرته
وينك يا داحي الباب يالتحضرني بالضيج
وصلت تراها وياي حد شقت الزيج
قبل الممات بيوم حضرني هواي
بيدك تغمض العين بيدك تنقط الماي
نقطلي بيدك ماي نقطلي واطلع
سكتلي اليبجون شماتي تسمع
اقدر اسكت الناس وامك واخوتك
قلي شي يسكت هواك لو درى بموتك
شي يسكت اليبجون عن لا يسمعون
حتى الينقط الماي شامت يمجنون
متعجب انعضيت وانت على البعير
انا بسما انعضيت وجلابي تطير
التتن بس والجاي صارن سلوتي
ومن السادة اريد العون يمهم مروتي
سيف الهجر سلوه وحكم بموتي
ويمك يطيب الذات صارت نخوتي
بالسادة ليش تعيل من الله ماتخاف
جدهم رسول الكون من نسل الاشراف
عنهم تنحى بعيد والتز بالاطراف
كل ظنك يخاويك مفتون الاوصاف
صاير طبع بالناس ننسى اليبعدون
بس انا مانساك لو تعمى العيون
مر بينا حر الصيف والشتا وبرده
وما بدلت بجفاك وجه المخده
يسهر بعيني الشوق طول الليالي
بوجه المخده تشوف وجهك ياغالي
طيفك حبيب العين ماهوت غيره
حتى الوساده تريد عطر الظفيرة
كاتب صباح الخير فوق المخده
محد عليها ينام الا الاوده
العلم زاد ك نور وزاد القلب نار
هايم يابنت الناس واكتم بالاسرار
بنور العلم يفلان اطرد ظلامك
ولا تكتم الاسرار واعلن غرامك
للحب معاني هواي تقراها بالعين
واسعد ليالي الشوق ملقا المحبين
انتي بظلام الليل لعيوني شمعة
ومن القلب منذور للحب ينبعه
ينبعة وسط الروح نبعة هوانه
وقلب الوفي من اليوم عندك امانه
ياولفي ياسلمان سير علينا
وخل محبس الاحباب يلمع بيدينا
يوفي ويعرف الطيب كلب تربي
ينقلب حيه عليك ابن ادم شبي
وصف العشق لو ضاع بين المحبين
حبنه غصن تفاح ومعاشر التين
الما يحب ملقاك منه اغسل ايدك
ويقطع عليك بحور قلب يريدك
أتمنى أهل الشوق يلتم شملهم
بالطرب واللحان اتبرع لهم
تمشي وتهز الكون من انت تمشي
اياك تدوس تراب ع الرمش امشي
كون انقلب عصفور واسكن سطحكم
كل ما اصيحن ويص معناها احبكم
يالضيعت هواك سم اشرب وموت
شلك بعد بالروح لو زفته تفوت
متعجب دمعك سمك بيه
دمعي فاض شطوط حوت الغرق بيه
من فوق سبع سطوح دمعي اريد ادهديه
ودورن يالحديثات تلقن سمك بيه
بالك تبيع سرار للمنك وبيك
هو اليطق طبول هو اليخزيك
ساسك رمل هيال من ياشريعه
للرايح وللجاي سرك تبيعه
شقيته ثوبي عليك وصلته للنص
شي طلع ساسك طين ومبرقع بجص
قلب اريد قصه بموس واقطع وريده
يبجي على بز الناس شنهوا اليريده
ياحادي اسري بليل والبيه بيه
انا الزرعت الطيب واحصد اذيه
اطلق واعتب القاع مثل المعسرة
حسبالي عشر فروخ تاليها حسرة
الحادي فنه يفوت والحادي فنه
دم للركاب يصير واخذها منه
دم للركاب يصير متعجب بهاي
بالدم مشى المشحوف متعني لهواي
بالدم مشى المشحوف منها وتكفيت
انا اشرق التابوت واكل لحم ميت
تاكل لحم ميت وعيونك تنام
انا اعزل اللحمات واقرط بالعظام
الحادي مابيه صوج المشى وياه
لا مر ع الديران لاوادع اهواه
ياحادي اسري بليل ابالك تبات
اخذت الحبيب وياك واليمي شمات
شماتي مو شمات شماتي اشرار
بالقبر ويقولون ياربي ع النار
شماتي مو شمات شماتي شمات
بالقبر ويقولون حي بعده لو مات
هلا ومرحب بيك واكثر بالويك
القلب قبل العين فز وتلقاك
بس جرح واحد بيك وتريد اضمدك
وانا كلي جروح والجمها عندك
بس جرح واحد بيك وتتشكه للناس
انا كلي جروح من ابهامي للراس
الدنيا بعدها بخير مو كلها اذيه
خمس الاصابع بيد ماهن سويه
ظلت بكيفك عاد وانت ضميرك
مشتاق اشوفك دوم واشتم عبيرك
حسرة وحدرها حا وبقلبي لوعة
كل ما اظوك الزاد اركض ازوعة
ارد ابجي تال الليل بس ابجي بهداي
الصخر لو له عيون جادمع وياي
الحادي فنه يفوت يسري بحدرها
بالشمس اسوي كسوف والكَاع اطرها
جرح الفراك يهون عن جرح الوداع
البيه دليل انصاب يتفصل رباع
زين وتشوف العين دلالك رباع
دلالي من فركَاه شضف غده وضاع
متعجب شضف صار دلالك انته
دلالي صار تراب والموت اسكته
جاوينه ذاك القال الخوى بالضيج
مرت عليا ايام تنشف الريج
يا عازت الخوان عازتها عازة
والماوراها صياح وحشة الجنازة
ميت والمعزيات موش امهاته
مايبجن على المات يبجن شماته
ميت والمعزيات مابيهن امه
وحده التشتم بيه وحده تغمه
ميت والمعزيات يبجن عيارة
وطفن على التابوت راس السكاره
قلبي ارد اقصه بموس واجوي بمجانه
دلاني على دروب كلهن مهانه
القلب تال الليل فز يطلب هواه
كل ساعة يريد يروح والعقل ينهاه
القلب تال الليل فز فرد فزه
لو للحبيب تروح لو نحري احزه
فاله ام سبع شاخات خشنة وجديدة
رصها بدليلي وصاح اطني الحديدة
زين انت ويقول اطني الحديدة
حط رجله بالدلال واملصها بيده
فاله بعشر شاخات واسود برصها
رصها بدليلي وراح والخشبة قصها
الدهر شل يمناي شل يسرتي البين
جابيش اشل جروح بيش امسح العين
يسرى ويمين اطيت متعجب بهاي
انا اربعتهن موت وهم فاقد الراي
تريد العيون تنام والروح ترتاح
بنص الدرب يافلان قلبي غفى وطاح
انا اون والحسرات يونن وياي
كل هذا وماخليت شامت درى بهاي
شبعان ضيم عليك حد الشبع ضيم
تصبح معيد الناس وانا اصبح بضيم
صارت بطني كلاب منك يادهري
يم تلد وارتاح بس الله يدري
برد الصبح كَرصات لفني بعباتك
وبساعة الشيطان انت ويه ذاتك
انا الصحت بجفاك خل روحي خلها
من صوتي حتى الكَاع راطت بهلها
ماتنسمع رحاي بس ايدي تدير
اطحن بقاية الروح موش اطحن شعير
لا ياجليل الذات يا الماتوافي
حسبالي بالشدات تحضرني حافي
يالمدعي بخوان جاوينه اخوتك
اقعد وسولك راي خاف اني افوتك
مابيه انقل خطاي مابيه اقومن
مابيه اجر حسرات مابية احومن
عبرت لكن طين يلحق ظهرها
محسودة بالموتات روحي بقبرها
حطني حدر يمناك خنجر عراقي
وقلبك جلد يهواي تحمل فراقي
يايمه ماتبجين مثلي على هواي
من جنتي بالعشرين ماصابج الداي
مطقوقه باليافوخ ماشوف حذاي
اصبح بريجي اليوم حنظل على هواي
بالك تهيج الروح خلها بغبنها
مابجت مثل بجاي الميت ابنها
ها خاله دقن حيل هاخاله وياي
موش ابني هذا المات الميت هواي
من الحزام وفوق مرخوص الاسمر
خاف الطمع يوازيك واحنا نتغشمر
حطي ايدج على اثنين بنتي الطمع زين
والثالث احجي وياه بالج تفلسين
ريت الله لا خلاك ياواشي الغروب
تاخذ حجي وتجيب وتخشن القلوب
صابغ هدومك ليش هاي انا اعدله
لو قطعوني بسيف حبك مابدله
الدهر لو وازاك هم انت وازه
سل سيفك بيمناك واطلب برازه
شمسوي انا بدنياي واشيتي سبعة
والثامن زغيرون يومي بصبعه
واقف بذاك الصوب يكسر الناظر
يضلوعي للمحبوب صيرن قناطر
متعجب بدنياك دلالك تراب
دلالي بالتيزاب يشقر هوى وذاب
ليل الشتا يهواي اثنعش واثنين ... كضيته بالحسرات وبدمعه العين

انهجم بيته النام واغمضت عينه ... ساعه على ساعه ايزيد نوحه ونينه

لاتظن عيني اتنام واطبك جفنها ... مثل التنكط الماي لوحيد ابنها

كلما يصير الليل يطرن احزانك .. عين العمه ولاشوف خالي مجانك

مانمت ربع الليل نشدوا المخده ... والدمع اصبح سيل للركبه حده

متحزمه بحزامين كل لطمي ويلي ... اطبك نهاري اوياه من يكظي ليلي

مابيه اون ونتين ليلي ونهاري ... من كثر نوحي اعليك ملاني جاري

ذب لك مخده اونام بين الشعايع ... دكان الك بالروح يشري ويبايع

هاك اخذ هاي العين عين التصدليك ... طمها ابجليل تراب جي صدت عليك

ضميته وسط احشاي عن لايبوكوه ... ثاريهم ابناظور بالكلب شافوه

الكلب لمته ونام شينيم العيون ... يبجن وهمه هنا لو شالوا شلون

محمود العراقي

thnx 7obi

شوكرا

[ندعوك للتسجيل في المنتدى أو التعريف بنفسك لمعاينة هذه الصورة]

حبايبي

مشكورررر

صحيح هوايه بس تجنن يسلموووووووووووووو

الله يسلمج علمود تبقين بلموضوع منورتة عيوني انتي خيت حياج الله

» °•.ஓ .•° (ترى الدنيا ماتسوى ) .°•.ஓ .•° .
» ممحشش اكنشف ان الدنيا غلط
» كـلـمـات اغـنـيـة الدنيا ام
» الدنيا عَلَّمَتْنِيْ (١٨) شَيْءٍ .. !!
» صور عجائب وغرائب الدنيا