قيصدة على الحكومة

هلاو
شباب وبنات

والله هذه القصيدة وصلتني على ايميلي وحبيت انقله الكم

كلمن عرشه
وكلمن لاهي بجيبه وكرشه
والشعب إمدولب ما عنده
يمر إنهـاره .. وما يتغـدّه
ويعبر ليله .. وما يتعـشّه
ومن ينام فاتح عينه وتابوته املولح يم رمشه
يحجي ...
يبجي ...
انطيتوه الذان الطرشه
هسه فرحتو ...؟
جيّرتوهه بجير وفختو
حرية إيش .. يا حريه
حكام انتم لو عفطيه ...

* * *
اشكَد صيّحتو .. دكتاتوريه ... وانبحتو
اشكَد احلفتو .. أسلحه تدميريه .. ونِحْتو
اشكَد جذبتو .. ومن ايران ولندن رحتو
لمّة لغّافه او لوكَيه
وبالبيت الابيض صبّحتو
وبيه الطمتو
وشكَيتو الزيج وهوستو ..
مظلوميه !! مظلوميه !!
عمي ربحتو
جبتوهم كَود ولملمتو
شي من هولنده وبلجيكه وشي من برلين وتـ هـ ران !
كل طايح حظ ...وما يسوه صُمّ ادنان
وفوك الدبابات اركَصتو
هسه فرحتو ...؟
جيّرتوهه بجير وفختو
حريتيش .. يا حريه
حكام انتم لو عفطيه ....

* * *
دكتاتوريه ........... بطُوله
ديمقراطيه ........... ممطوله
صح دكتاتوريه !!. لاكن جان الواحد يمشي بطوله
* * *
وصح دكتاتوريه ...
بس غِيْره .. وأكبر خيمه اتلم الناس
ومن نحلف ما جنه انجذب بالكاظم لو بالعباس
وفوك الراس
جان اعكَال
مو بُسطال
وصح دكتاتوريه ...
بس آنه الشيعي من المشخاب ماخذ سنيه من الموصل
وعندي ابنيه
حفصه اسمها
يوم الخطبتها الحجيه
لـحيدر ابنها
ما فكرت احجي واسألهه : سنية انتي لو شيعية؟؟
ومن قاتلنه اثمن اسنين بحرب ايران
فوك الساتر جان حسين إيزيّت رشاشة عثمان
وبعاشور يطبخ مهدي
وعمر يوزّع هل المقسوم إعله الجيران
جنة اخوان
وكَطرتنه البلكَصه امرايه
والحنيّه البينه اهوايه
هسه اشبينه وصرنا احجايه
ويحكم بينه ابن امداس
أصلْ الما عنده ولا ساس
ايراني امزوّر جنسيه
وصح دكتاتوريه ...
بس جنه .... ما ناخذ لمريكي تحيه
والبيريّه
لو طاحت من راس الجندي
اتكَوم الكَاع واتحط ّبيريته اعله الراس
خو مو انتو
هسه فرحتو ...؟
جيّرتوهه ابجير وفختو
حريتيش .. يا حريه
حكام انتم لو عفطيه

* * *
وصح دكتاتوريه ...
دوله
غصبن عني وعنك دوله
وناس الما بيهم بس يحجي
وما بيهم واحد فيترجي ، ولا امزورجي ، لوْ قندرجي
وامعمم حشاش ولاكَف واشما دارت ريح ايدور
ولا بيهم رادود بـمشهـد ... واهنا سـميناه دكتور
ولا لطّامه ..
جذب ايلطمون ويبجون
ولا لكَامه ..
ولغّـافه وبس ايبوكَون
ولا أمريكي اليكتب عنهم ويوقعون
ولا ربهم ايران
اشكَالت ايران ايكَولون
ولا باسو ايدين كروكر
وبيه .. مو بالله ايحلفون
ولا باكَو نفطات الكَاع وبيهن بايران يعمرون
وما عدهم شركات ابلندن
شربو بيهه ادموع الشيعه وأكلو لحم اليخمسون
ولا أخذو أم من طفلتهه
ولا شدو علراس اكَرون
خو مو انتو
هسه فرحتو ...؟
جيّرتوهه ابجير وفختو
حريتيش .. يا حريه
حكام انتم لو عفطيه
* * *
والله قوانه المظلوميه ..
من اسودنه واعرفناكم
واتصخمنه وصدكَناكم
واتلطمنه وخليناكم .. شاطي باطي بينه من زمان اتلعبون
وصرتو .... علج ابطانيه
بس نسمع بالمظلوميه
هسه حكمتو
شو لا دزني اتلعّـبْ اطفال اطويريج
ولا كنتاكي ضاكَوه أهل الديوانيه
ولا جبتو عماير بولنده والزكتوهن بالمشخاب
ولا هولنده جبتو وردهه .. نص ازرعتوه بالغراف
ونص ازرعتوه بالهنديه
وهاي الحله شو ما سويتوهه الصين
وذيج الحمزه ما صارت تشبه بلجيكه
ولا عفج التشبه برلين
وخان النص ما بي أنفاق
ولا مترو المن يمشي .. يمشي اعله الطاقه الشمسيه
والكوفه ما صارت بون
وما مديتو اجسوره طويله تِعْلَه وتِنصَه للوادم لو زارت عون
والبصره ما تشبه كنده
ولا ميلانو صار الحي
ولا صارت ميسان ميامي
ولا باريس المحموديه
ولا شلالات المكسيك حطيتوهن بالاهوار
والعشار...
شو ما صار
يشبه مدريد وميلان
ولا الشعله صارت بانكوك
ولا الثوره صارت يونان
ولا يشبه المشرّح سدني
ولا صار القاسم يابان
مو صيّحتو ... مظلومين
واطوطحتو ... مظلوميه
ثاريكم بوخه
وبس دوخه .. واعمايم يلبسهه اخريه
وكَضيتوهه ويانه ونين
يا بويه اشكَد اتونون
سبع سنين
مابلّطتو اشويرع بيهن مو خاف اتعبون !
وذني البيهن تجتمعون
خو مو انتو
هسه فرحتو ...؟
جيّرتوهه ابجير وفختو
حريتيش .. يا حريه
حكام انتم لو عفطيه

ههههههههههههههههههههههههههههههههههههه

وربي حلوه هاي شنو ايميلج بي حشاشة هع هع

مشكور ياغالي
الحشاشة في كل مكان
بس عتاد ماكو
تحياتي

والله انيالة حضة اللي انتي بأيميلة خخخخخخخخخخ

تسلمين روعة بربي

مشكورررر

ههههههههههههههههههههههههههههههههه يسلمو

» تشكلت الحكومة الجديدة
» ذي قار / عاجل عاجل : بامر المالكي الحكومة المحلية تتجرأ على الله وتهدم مسجد السيد محمد باقر الصدر في جنح الظلام